餐廳資料：Korean Canteen

*注意：餐廳室內油煙味略重，堂食完身上會有陣油煙味

可能因為受天氣影响，今日中午特別肚餓。並巧女皇煲完韓劇想食韓式炸雞，二話不說就帶她再到呢間 Korean Canteen 。因為佢地既招牌甜酸雞（算是韓式炸雞吧…）真係無得輸。

二話不說坐底就嗌左個招牌甜酸雞，同往常既唔一樣，今日即炸的真係比較硊口，就連隨雞附上的兩粒年糕都被炸到外硊內軟。可算是繁忙時間的一大好處吧。

叫得Korean Canteen，呢間餐廳的風格的確相當食堂風。店內都被附近工商廈來的文員坐滿。但為了接應午市的黃金賺錢時間，店長姨姨都會盡力為每位客人拼接枱櫈，務求賺得一蚊得一蚊。介意搭枱的朋友最好就湊夠4人一枱。

記得多年前在溫哥華生活時，當地有間相當著名的韓國餐館（祖母屋）。係佢令我食到呢生人最好味既前菜薯仔同埋韓式炒粉絲 (嗌 Jap Che) 。之後返香港生活，就四出試搵番一樣的味道。

講到呢度，可能你會以為我想講呢間既炒粉絲整得好好味… 很可惜，我上次來的時候已經試過，依然係一貫的hea味。

所以我都係決定叫番個有「招牌」字樣的菜式：招牌韓國雜錦伴飯（$48）

純外觀睇落，可能會誤會個飯係涷上的，但放心，熱到你阿媽都唔認得，只係爭在佢唔係用石鍋上菜。但肉汁欠奉，呢個時候就如同食越南菜一樣，見到枱面有咩汁就試下落咩汁…

可以話成個伴飯要食糊都係靠呢支辣汁。利申我食得辣既程度，就連譚仔既十小辣都會辣到跳起。所以各位唔辣人士都可安心狂唧。

女皇就無咁好彩了，嗌左個見到都知道麻麻地既烏冬。烏東咬口偏粉，並不是她最愛的稻亭烏冬。

通常為了公正，我寫食評只會寫我食過既野，但因為女皇胃口不佳，我啃左半碗。清湯烏冬的味道同炸雞形成極強列的對比，但應該頗適合口味偏淡的人士。特別需要提醒的，千萬別加韓國辣汁，隻味溝唔埋。

而隨餐附上的泡菜餃子，只能以硬來形容。油膩的味道令一向唔浪費食物的我都必需遺棄一粒在碟上。

是次午餐

1. 招牌韓國雜錦伴飯（$48）
2. 煎泡菜餃子湯烏冬（$43）
3. 招牌甜酸雞（大）$58
4. 隨餐加$2有罐裝汽水

總結

離開時見到其他熟客都叫了石鍋類的菜式，驟眼睇賣相相當吸引。我唔排除被鮮艷的泡菜紅色所吸引，但是感覺算是值得一試的。

加兩蚊就有罐裝汽水呢一點又是一個平價賣點。但「樂天柚子茶」真的太甜了，和可樂相比，我覺得可樂還淡味一點。忌甜的人要小心，這個並不是茶味的。