學用EUC可以話難但又唔係好難

戴定頭盔先旨聲明 – 系香港玩電動獨輪車係明文規定唔合法的，根據運輸署的條列：

條列：所以系任何道路上玩EUC都係犯法，捉到除左會罰$8000港幣，更需要停牌（車牌）一年，無車牌的可能仲會加多條無牌駕駛。我只係系自家室內轉黎轉去練習平衡的感覺，所以大家要自己衡量風險。

幾年前風火輪熱潮時，偶爾系朋友的studio見到都會因好奇心驅使下踩上去試試。因為系國外、用風火輪＋Stabilizer 黎拍野真係好平常，平常到近乎係一種未來趨勢，唔識既話真係會好脫節…

但唔知點解每當我踩風火輪既時候總係覺得自己會向前仆… 而每當諗到向前仆果下兩個波羅蓋會位即重傷的感覺，就令我對呢類電動車相當卻步。

直至有次偶爾見到有人用電動獨輪車 (EUC = Electric UniCycle ) 送貨，見佢拎住啲貨仍然可以好靈活咁轉灣以及倒後行，睇上去既感覺相比起風火輪真係穩定好多，亦令我好好奇獨輪車係咪都可以用黎拍野。諗左唔夠一日就膽粗粗上網search 左當其時眼見果位送貨人員用果架獨輪車仔 – Begode Mten 4

除左因為見到果位送貨人員用呢架車之外，我都被呢架車仔既size同尾燈吸引到，細細架，燈大大 XD 唔好諗邪野。

上網訂唔難，但等送貨就等左好耐，可能咁岩因為疫情影响，等左差不多一個月先送到，期間每日都好期待架車送到黎。唯有不停上網search 有關學習使用獨輪車既資訊黎望梅止渴。發現原來系台灣同外國相對對獨輪車寬容得多，可能始終地方大同埋人口密度、單車徑的規劃同配套都相差太遠。

系網上最容易search到的Unicycle youtube channel

見到佢地玩得真係好自由好暢快，都令我更想快啲學識使用EUC，日後回到加拿大時都希望可以好似wrongway 的adam 咁踩住架EUC代步。

但現實係，EUC係咪真係咁易學得識呢？以我自己的學左兩日(時數加埋5hrs) 既親身經歷，Day1真係覺得好好好好難學。唔好話學行，就連企上架車都係極大挑戰（汗）Day1 當晚我差不多全程只能夠扶住身邊所有可以扶既野，勉強跳上架車上練習平衡的感覺。偶爾會提起勇氣嘗試放手行下直線，但唔夠3米就已經因為左右不平衡跌番落黎。但以危險程度黎講可以話點都比當初試玩風火輪時安全。因為每次我從獨輪車上失去平衡時，我都可以立即跳開然後安全企番落地，而唔會好似風火輪咁向前或向後仆街。

根據我系網上搵到既教學影片，學用獨輪車不外乎要練習幾個基本功：

單腳扣車前後郁
單腳扣車前後劃出弧型
單腳向前滑行一小段距離然順勢上車
慢停然後落車

練好呢四個基本功之後，基本上真係練習行直線同埋轉彎。如網上的教學片所講，越慢速難度就越高，因為獨輪車的平衡原理其實同踩單車一樣，要有一股往前或往後的作用力，先可以一直平衡到。而且如果一直扶住野黎練，成個人既重心基本上真會側重左系一邊，講白啲扶住野黎行跟本就唔會學得成。但Day1嘛，就扶住黎熟習下個感覺先，急唔黎。然後Day1的最大學習感覺係，腳板勁攰，下半身及腰都勁攰勁酸痛，直頭好似做完Gym黎咁。

（Day2) 相隔十幾個鐘頭後，今晚再次踏上獨輪車，忽然感覺好似有啲唔同左。雖然開頭都係未係平衡得好好，但提起勇氣放開扶手向前行一小段，已經無咁東歪西倒，靠住揮動雙手黎保持平衡都可以走到直線，而且腳板都無咁易覺得攰。

練完一陣，抖一陣再上車，突然感覺自己又好似可以行得遠啲。大膽嘗試轉彎，成功，但又只能向右轉彎，一旦向左轉彎就好似另一邊身唔夠力回復平衡一樣，只能側倒下車。咁就先練習不停向右打圈行，建立信心再挑戰。如是者，練左大約十幾分鐘後，抖陣再上車，覺得可能係向左轉時身體唔夠側向反方向，就大膽啲不停試向左轉，就成功找到感覺了。